Bottervliee en grillerige goeters!

Ons het ons laaste dag in die kaap by die Butterfly world buite die Paarl spandeer. Dit was natuurlik 'n groot hoogtepunt vir my. Die temperatuur word binne beheer en dit voel of mens in 'n tropiese woud instap. Juis daarom kan hulle skoenlappers daar aanhou wat nerens anders in SA kan oorleef nie. Daar is honderdes van die goetertjies wat om mens rondvladder.

Mooie groene

Hierdie skoenlapper lyk dalk nie so mooi nie - maar jy sal jou mening oor hom verander as jy sien dat hy omtrent so groot soos jou kop is!!!

En toe... die onverwagte "ekstras". 'n insek en reptiel afdeling. Ek kry nou nog 'n rilling as ek daaraan dink. Die van julle wat my ken weet mos dat ek nou nie juis boesemvriende is met gedierte se kind nie. Daar was 'n ou swart vrou wat daar gesit het om hulle op te pas. En terwyl ek en Pieter nog so na die skerpioene en spinnekoppe in hulle TOE geseelde glas bokse staar, kom druk sy 'n helse tarantula onder ons neuse in. Toe - hou vas. Ek het amper net daar 'n prolaps gehad!

Ons het toe ewe ordentlik NEE DANKIE gese, en vir die deur begin mik, maar toe pluk sy 'n slang daar uit 'n boks. Ek wou nog 'n geluid los, toe is die ding al in Pieter se hande. Hulle het my toe ook oorreed om die ding vas te hou, en na 'n hele 5 sekondes (net genoeg om 'n foto te neem), was hy weer terug in sy boks!

Die vrou vertel ons toe dat daar nog net 1 is wat ons darem moet vashou, maar toe ons sien dat sy vir die glas kas met die luislang in mik, het ek vinnig voete gemaak!
Ek was baie bly om toe weer terug tussen die bottervliee te wees! Kyk hierdie mooi tropiese habitat!
Hierdie kiekie is dalk nou nie so amazing nie - maar kyk bietjie wat sien jy... Die ou dingetjie se vlerkies is deurskynend! Dit is ongelooflik om te sien! Dit is so mooi om hulle te sien rondvlieg!
Beslis die moeite werd om te gaan besoek! (vat dalk maar net 'n skoon stel onderklere vir jou saam!)